Leiklistarskólinn er fyrir fólk
á aldrinum 8-15 ára.Leikárið 2008-2009 stofnaði LA sinn eigin leiklistarskóla. Aðsóknin fór fram úr björtustu vonum og þann vetur voru haldin tvö námskeið.
Veturinn 2009-2010 fjölgaði nemendum mjög og voru um 70 nemendur við skólann á vorönn. Námskrá Leiklistarskólans er í sífelldri endurskoðun og í vetur mun hvor önn standa í 12 vikur og kennslustundin vara 90 mínútur, einu sinni í viku. Áfram verður náminu skipt upp í haust- og vorönn og hefst haustönnin 6. september.
Námið:
Leiklist:
Kennd er grunnfærni í leiklist. Farið í undirstöðuatriði í einbeitingu, trausti og tjáningu. Nemendur fá að spreyta sig jafnt
á skrifuðum texta og spunavinnu og fá auk þess þjálfun í að standa á sviði. Hluti námsins fer síðan í að kynna
aðra innviði leikhússins og munu gestakennarar koma í heimsókn. Nemendur fá einnig að líta inn á æfingar hjá Leikfélagi
Akureyrar. Nemendum verður skipt í hópa miðað við reynslu, og hjá þeim nemendum sem voru á haustönn þyngist námið og verður
viðameira.
Söngur:
Nemendur koma í smærri hópum í söngtíma þar sem kennd er létt söngtækni, öndun og raddbeiting. Nemendur æfa sig á
léttum sönglögum og finna lag í samráði við kennara sem þeir vilja syngja í lokasýningunni - þó þarf enginn að syngja
einsöng sem það ekki vill. Nemendur sem voru í skólanum á haustönn fá viðameiri verkefni og ítarlegra nám í
sönglistinni.
Hvorri önn lýkur með nemendasýningu eða opnum tíma á sviði LA og er aðgangur ókeypis.
Kennarar við Leiklistarskóla LA í vetur eru: Berglind Jónsdóttir og Jana María Guðmundsdóttir og Ásta Magnúsdóttir.
Námskeið fyrir fullorðna mun hefjast 20. september og í bígerð er einnig að bjóða upp á námskeið fyrir unglinga á aldrinum 16-20 ára.
Auglýst verður nánar í staðarmiðlum hvenær tekið verður á móti umsóknum í skólann á haustönn 2010.
